كامب الحاج ديفيد
إزاى؟؟ ليه!!
للى مايعرفش هى عبارة عن ايه اسمحلى اقولك
معاهدة كامب ديفيد هى اتفاقية تم التوقيع عليها عام 1978 وبالتحديد فى 17 سبتمبر بين رئيس الجمهورية آنذاك محمد انور السادات ورئيس وزراء (صهيائيل) مناحيم بيجن فى المنتجع الرئاسى كامب ديفيد بأمريكا تحت اشراف رئيس الولايات المتحدة الامريكية فى ذلك الوقت جيمى كارتر والشهادة لله كانت هى السبب فى تسلم السادات جايزة نوبل :D
دى نبذه عن ظروف المعاهدة اما بالنسبه للنص فى اللينك اللى جاى دا نصها اللى ارجو يكون مظبوط الى حد كبير ومرفق فى الرابط المراجع اللى تم الحصول على بنود المعاهدة من خلالها وممكن يكون فى بنود مش معلن عنها واهو الرابط
http://www.shabab3net.com/vb/showthread.php?t=12059&page=1 مع العلم ان الملاحق اللى تم ذكرها فيها بلاوى لانها بتذكر قد ايه احنا كجيش مصرى وكشعب ودولة ليها سيادتها تم هضم حقوقها على ارضها وقد ايه احنا ملناش حق فى اراضينا فى سينا وقد ايه الجيش مش بيتحرك على ارضه زى ما هو المفروض يحصل دا غير ان قواتنا مش موجوده اساسا على الحدود :D موجوده بإستهبال يعنى اكنهم رايحين فسحه وقد ايه احنا مستنيين اللقمه من امريكا
اعداد ضئيلة من الجيش والبوليس المصرى!!
اسلحة تحس انها لعب اطفال بأعداد مستفزة تحس انه اصلا مفيش اسلحة!!
دا غير ان الارض اصلا مش كلها بتاعتنا زى (ايلات) اللى هى اصلا (ام رشراش) اللى الناس فكراها اسرائيلية مع الاسف!!
بدل ما اكتب التفاصيل اللى هتوضح وتثبت كلامى :
فى كتيب مؤخرا قرأته للأستاذ محمد سيف الدولة مشهور اوى وحاز على اعجاب العديد من حيث التلخيص والتبسيط للمصايب اللى اتسببت فيها المعاهدة لو قريته مع الاسف هتلعن اليوم اللى وقعنا فيه معاهدة زى دى الكتيب اسمه
(الثورة على الكتالوج الامريكى)
انا مش المهم عندى اشرح بالتفصيل ولا اقول نصوص المعاهدة عشان دا هايحتاج كتب وصفح كتير اوى مش حتة تدونية صغيرة انا بس حطيت رابط ملخص للبنود وكتيب فيهم المختصر المفيد
اللى عايزة اقوله معاهدة العار دى اللى هى جابتنا ورا مليون خطوة ازاى متتلغيش
هتحصل حرب عاااااااااادى لو حصلت كدا كدا ربنا كاتب اننا نقف قدامهم مش هتفرق وبعدين احنا هنخاف من ايه نعيش بكرامة احسن ما نتذل لأمريكا وبنتها فى الرضاعة
انزل بكرا يوم سته اكتوبر معانا انا وكل الناس اللى عايزة تقول لأ للذل لأ للعار لأ لإهانة الكرامة لأ لسرقة أرضنا وقتل جنودنا على الحدود عينى عينك وكمان منفتحش افواهنا لأ للتبعية لأمريكا والسكوت على دلع بنتها
يوم سته اكتوبر زى ما (شرفاء) الجيش المصرى خير أجناد الارض انتصروا على الصهاينه زى ما ان شاء الله (شرفاء) الجيش والشعب هايقولوا لأ للمعاهدة عشان ام رشراش ترجعلنا هى وكل سينا عشان جنودنا اللى استشهدوا على الحدود حقهم يرجع لهم عشان جنودنا اللى استشهدوا فى حرب 73 يبقوا سعداء فى المكان اللى هما فيه
كلنا لازم نقول لأ عشان يبقى لينا سيادة على ارضنا ونقدر نتنفس عشان منصدرش غاز يتقتل بيه اطفال ابرياء ملهمش ذنب فى فلسطين عشان النور هنا مايقطعش عشان احنا اصلا مش لاقيين غاز ونديه لغيرنا وعشان بعد كام سنه ممكن منلاقيش الغاز دا اصلا
كلنا لازم نقول لأ عشان منشحتش اللقمه من امريكا ونمشى وراها ونعمل اللى هى عايزاه اللى ضد ارادتنا
كلنا لازم نقول لأ عشان يوم ما نقسم حتى اللقمه من امريكا منقسمهاش مع (صهيائيل)
كنا لازم نقول لأ عشان نعرف نعيش
بكرامة وحريه
شكرا
ليست هناك تعليقات:
إرسال تعليق